“Dolzarb 30 kun” doirasida yong‘in xavfsizligiga oid amaliy mashg‘ulotlar o‘tkazildi

Mamlakatimiz energetika sohasi korxonalarida mehnat xavfsizligini ta’minlash, xodimlar malakasini oshirish, ishlab chiqarish jarayonida yuzaga kelishi mumkin bo‘lgan favqulodda holatlarga tayyorgarlik darajasini mustahkamlash borasida tizimli ishlar amalga oshirilmoqda. Ayniqsa, “Dolzarb 30 kun” profilaktik tadbirlari doirasida olib borilayotgan chora-tadbirlar bu borada muhim ahamiyat kasb etmoqda.

Xususan, Angren issiqlik elektr stansiyasida mazkur tashabbus doirasida navbatdagi yong‘in xavfsizligiga oid amaliy targ‘ibot tadbiri tashkil etildi. Tadbir “Obe’kt binolarida yong‘in xavfsizligini ta’minlashni tashkil etish bo‘limi” va Angren shahar Favqulodda vaziyatlar bo‘limi hamkorligida o‘tkazildi.

Tadbir davomida ishchi-xodimlar ishtirokida nazariy va amaliy mashg‘ulotlar olib borildi. Mutaxassislar tomonidan yong‘in kelib chiqishining sabablari, uning oqibatlari, favqulodda vaziyatlarda harakatlanish tartibi, yong‘in o‘chirish drujinalarining vazifalari hamda ulardan samarali foydalanish bo‘yicha atroflicha tushunchalar berildi.

Shuningdek, mashg‘ulotlarda ishtirokchilarga o‘t o‘chirish vositalaridan to‘g‘ri foydalanish, yong‘in vaqtida ko‘rilishi lozim bo‘lgan choralar amaliy misollar asosida ko‘rsatib berildi.

Tadbir yakunida xodimlar o‘zlarini qiziqtirgan savollar bilan mutaxassislarga murojaat qilishdi va ushbu savollarga atroflicha javoblar berildi.

Ta’kidlash joizki, bunday mashg‘ulotlar nafaqat xodimlarning bilim va ko‘nikmalarini oshirish, balki ular xavfsizligini ta’minlash, favqulodda holatlarda tezkor harakat qilish malakasini shakllantirish, shu bilan birga, ishlab chiqarish jarayonining uzluksiz va samarali davom etishiga xizmat qiladi.

“Angren IES” AJ Matbuot xizmati