Sport musobaqalari o‘tkazildi

“Issiqlik elektr stansiyalari” AJ tarkibidagi “Angren IES” va “Yangi-Angren IES”da sportning stol tennisi, shaxmat va shashka turlari bo‘yicha saralash musobaqalar bo‘lib o‘tdi.

Tadbirlar korxonalarda sog‘lom turmush tarzini keng targ‘ib etish, xodimlar o‘rtasida jamoaviy ruh, hamjihatlik va do‘stona munosabatlarni mustahkamlash maqsadida tashkil etildi.

Musobaqalar korxona kasaba uyushmasi qo‘mitasi tashabbusi bilan o‘tkazilib, unda ishchi-xodimlar, muhandis-texnik mutaxassislar hamda ayollar jamoasi vakillari faol ishtirok etdilar.

Bellashuvlar erkaklar va ayollar o‘rtasida alohida yo‘nalishlarda o‘tkazilib, ishtirokchilar o‘z mahoratlari, topqirligi va jismoniy tayyorgarliklarini namoyish etdilar. Shaxmat va shashka bo‘yicha bahslar ishtirokchilarning mantiqiy fikrlash qobiliyatini sinovdan o‘tkazgan bo‘lsa, stol tennisi musobaqalari tezkorlik va chaqqonlik jihatidan qizg‘in kechdi.

Tadbir davomida ishtirokchilar bir-birini qo‘llab-quvvatlab, korxona jamoasida do‘stona va ijobiy muhit yaratildi. Sport tadbirlari xodimlarning sog‘lom turmush tarzini shakllantirish, bo‘sh vaqtni mazmunli o‘tkazish hamda jamoa ruhini mustahkamlashda muhim ahamiyat kasb etmoqda.

“Angren IES” va “Yangi-Angren IES” Matbuot xizmati