“Issiqlik elektr stansiyalari” AJ boshqaruv apparati tomonidan issiqlik elektr stansiyalari va markazlariga chiqqan holda, xodimlarning takliflari va murojaatlarini o‘rganish maqsadida sayyor qabullar o‘tkazish an’anaga aylangan. Navbatdagi sayyor qabul Angren IESda o‘tkazildi.

“Issiqlik elektr stansiyalari” AJ boshqaruvi raisi o‘rinbosari A.Djo‘rayev boshchiligidagi jamiyat boshqaruv apparati mas’ul xodimlar guruhi tomonidan o‘tkazilgan sayyor qabulda Angren IES ma’muriyati, kasaba uyushmasi qo‘mitasi vakillari hamda stansiya xodimlari ishtirok etdilar.

Sayyor qabulda 20 ga yaqin xodimlar murojaatlari tinglandi. Qabulga kelgan xodimlar bank imtiyozli kreditlari va uy-joy, ish stajini aniqlash va ish faoliyatini boshqa sexlarda davom ettirish kabi masalalar bilan murojaatlar qildilar. Mutaxassislar tomonidan murojaatchilarga tegishli huquqiy maslahat va tavsiyalar berilib, qator ko‘tarilgan masalalar esa joyida ijobiy hal etildi.

Qabul davomida ishchi guruhi a’zolari mehnat huquqiga rioya etilishi, mehnatga haq to‘lash tizimini o‘rgandilar, shuningdek, “Inson qadri uchun” tamoyili asosida xodimlarga qulay mehnat sharoitlarini yaratish bo‘yicha amalga oshirilgan ishlarni davom ettirish xususida tavsiyalar berdilar.